un se milne ki iltija ki hai

un se milne kī iltijā kī hai

dil-e-nādāñ ne ye ḳhatā kī hai

maiñ khiñchā jā rahā huuñ us kī taraf

ye kashish husn-e-fitna-zā kī hai

ḳhud-farebī meñ mubtalā rakh kar

zulm kī tum ne intihā kī hai

qaul aur fe.al meñ tazād ravā

baat kuchh pīr-e-pārsā kī hai

daur-e-hāzir ke peshvāoñ meñ

ḳhvāhish-e-sīm-o-zar balā kī hai

jiite jī maġhfirat kā ḳhvāhāñ huuñ

baat ab zahmat-e-duā kī hai

ye man-o-tū kī kār-farmā.ī

zehn-e-ādam ne jā-ba-jā kī hai

maqsad-e-zindagī samajh baiThā

chashm-e-bīnā jo us ne vā kī hai

jhuk rahī hai 'azīm' apnī jabīñ

ye karāmat to naqsh-e-pā kī hai

un se milne ki iltija ki hai

dil-e-nadan ne ye KHata ki hai

main khincha ja raha hun us ki taraf

ye kashish husn-e-fitna-za ki hai

KHud-farebi mein mubtala rakh kar

zulm ki tum ne intiha ki hai

qaul aur feal mein tazad rawa

baat kuchh pir-e-parsa ki hai

daur-e-hazir ke peshwaon mein

KHwahish-e-sim-o-zar bala ki hai

jite ji maghfirat ka KHwahan hun

baat ab zahmat-e-dua ki hai

ye man-o-tu ki kar-farmai

zehn-e-adam ne ja-ba-ja ki hai

maqsad-e-zindagi samajh baiTha

chashm-e-bina jo us ne wa ki hai

jhuk rahi hai 'azim' apni jabin

ye karamat to naqsh-e-pa ki hai