un se puchho kyon aate hain humse patthar khane log

un se pūchho kyoñ aate haiñ ham se patthar khāne log

ham se kuchh ummīd na rakkheñ ham to haiñ dīvāne log

jismoñ ke mābain hai ik taaza taaza dīvār magar

kaise kah duuñ ab haiñ parā.e ye jāne-pahchāne log

jaane kyā kyā aur dikhā.e aql kā ye andāz-e-junūñ

dil ko dil se kaaT rahe haiñ kab se kuchh farzāne log

dekhnā in kirchoñ se ab tum haath na zaḳhmī kar lenā

haañ kuchh aisī baat huī thī pheñk ga.e paimāne log

jab se sheva pīr-e-muġhāñ kā jāmoñ kī taḳhsīs banā

maiḳhāne se ik ik kar ke ruuTh ga.e dīvāne log

hotī jo ummīd zarā bhī hoñToñ ko tar karne kī

galiyoñ galiyoñ ḳhvār na phirte ho aate maiḳhāne log

bhiiḌ lagī thī raste raste jab tak sub.h ke saa.e the

dhuup baḌhī to ik ik kar ke baiTh ga.e sustāne log

jiite jī ahvāl kī pursish mashriq kā dastūr nahīñ

maut kī mīThī niiñd sulā kar aate haiñ ġham khāne log

Tīseñ sher meñ Dhaltī haiñ to hotā hai tanhā 'kausar'

lutf uThāne sheroñ se phir aate haiñ begāne log

un se puchho kyon aate hain hum se patthar khane log

hum se kuchh ummid na rakkhen hum to hain diwane log

jismon ke mabain hai ek taza taza diwar magar

kaise kah dun ab hain parae ye jaane-pahchane log

jaane kya kya aur dikhae aql ka ye andaz-e-junun

dil ko dil se kaT rahe hain kab se kuchh farzane log

dekhna in kirchon se ab tum hath na zaKHmi kar lena

han kuchh aisi baat hui thi phenk gae paimane log

jab se shewa pir-e-mughan ka jamon ki taKHsis bana

maiKHane se ek ek kar ke ruTh gae diwane log

hoti jo ummid zara bhi honTon ko tar karne ki

galiyon galiyon KHwar na phirte ho aate maiKHane log

bhiD lagi thi raste raste jab tak subh ke sae the

dhup baDhi to ek ek kar ke baiTh gae sustane log

jite ji ahwal ki pursish mashriq ka dastur nahin

maut ki miThi nind sula kar aate hain gham khane log

Tisen sher mein Dhalti hain to hota hai tanha 'kausar'

lutf uThane sheron se phir aate hain begane log