ungliyon se miTTi mein suraten banate ho

uñgliyoñ se miTTī meñ sūrateñ banāte ho

ik jahāñ banāte ho ik jahāñ miTāte ho

ḳhaak se dobāra kyā āsmāñ banā loge

āsmāñ ko tum aise ḳhaak meñ milāte ho

kyā azal se pahle thā kyā abad se aage hai

dekhte haiñ ye parda kab kahāñ girāte ho

kār-gāh-e-hastī meñ jab fanā muqaddar hai

phir fanā ke aalam ko kaise bhuul jaate ho

merī be-gharī kā bhī aaj mājrā sun lo

ūñche ūñche mahloñ kī dāstāñ sunāte ho

zaḳhm jin ko dete ho pattharoñ kī bārish se

pairahan se kyuuñ un ke phir alam banāte ho

munsifī ke aa.iiñ ko tum ne hī to likkhā hai

sar jo jhuk nahīñ saktā us ko kaaT laate ho

ungliyon se miTTi mein suraten banate ho

ek jahan banate ho ek jahan miTate ho

KHak se dobara kya aasman bana loge

aasman ko tum aise KHak mein milate ho

kya azal se pahle tha kya abad se aage hai

dekhte hain ye parda kab kahan giraate ho

kar-gah-e-hasti mein jab fana muqaddar hai

phir fana ke aalam ko kaise bhul jate ho

meri be-ghari ka bhi aaj majra sun lo

unche unche mahlon ki dastan sunate ho

zaKHm jin ko dete ho pattharon ki barish se

pairahan se kyun un ke phir alam banate ho

munsifi ke aain ko tum ne hi to likkha hai

sar jo jhuk nahin sakta us ko kaT late ho