unhen aadat hamein lazzat sitam ki

unheñ aadat hameñ lazzat sitam kī

udhar shamshīr idhar taqdīr chamkī

kahūñ kyā dard-e-dil kab se baḌhā hai

nigāh-e-lutf tum ne jab se kam kī

qadam chūmeñge tere ho ke pāmāl

chaleñge chaal ham naqsh-e-qadam kī

yahāñ tak un ke va.ade jhuuT nikle

qasam ko bhī huī hājat qasam kī

vo zulf-e-mushk-bū bikhrī huī thī

khulī chorī nasīm-e-sub.h-dam kī

yahāñ tak un ko pās-e-rāz-e-ḳhat thā

ki ḳhāme kī zabāñ pahle qalam kī

zamīñ par is adā se paañv rakkhā

ki āñkheñ khul ga.iiñ naqsh-e-qadam kī

kahāñ piirī meñ vo raushan-bayānī

zabāñ to hai charāġh-e-sub.h-dam kī

kahāñ ham aur kahāñ baḳhshish hamārī

'jalīl' ik mauj bhī abr-e-karam kī

unhen aadat hamein lazzat sitam ki

udhar shamshir idhar taqdir chamki

kahun kya dard-e-dil kab se baDha hai

nigah-e-lutf tum ne jab se kam ki

qadam chumenge tere ho ke pamal

chalenge chaal hum naqsh-e-qadam ki

yahan tak un ke wade jhuT nikle

qasam ko bhi hui hajat qasam ki

wo zulf-e-mushk-bu bikhri hui thi

khuli chori nasim-e-subh-dam ki

yahan tak un ko pas-e-raaz-e-KHat tha

ki KHame ki zaban pahle qalam ki

zamin par is ada se panw rakkha

ki aankhen khul gain naqsh-e-qadam ki

kahan piri mein wo raushan-bayani

zaban to hai charagh-e-subh-dam ki

kahan hum aur kahan baKHshish hamari

'jalil' ek mauj bhi abr-e-karam ki