unhen batao jo kahte hain kya bacha mere pas

unheñ batāo jo kahte haiñ kyā bachā mire paas

har ek chiiz luTā kar ḳhudā bachā mire paas

uThāne vaale uThā le ga.e ḳhazīna-e-zar

maiñ ḳhush-nasīb huuñ raḳht-e-duā bachā mire paas

ka.ī samā.ateñ ḳhā.if haiñ is liye mujh se

sukūt-e-shahr meñ sañg-e-sadā bachā mire paas

maiñ dushmanoñ ke liye bhī to fikrmand nahīñ

ki ḳhair-ḳhvāh bhī ab kaun sā bachā mire paas

zabāñ khule to bharam dostī kā jaatā hai

ḳhamosh huuñ ki yahī rāstā bachā mire paas

zamāna us pe bhī nārāz hai ki le de kar

havāla sirf tire naam kā bachā mire paas

unhen batao jo kahte hain kya bacha mere pas

har ek chiz luTa kar KHuda bacha mere pas

uThane wale uTha le gae KHazina-e-zar

main KHush-nasib hun raKHt-e-dua bacha mere pas

kai samaaten KHaif hain is liye mujh se

sukut-e-shahr mein sang-e-sada bacha mere pas

main dushmanon ke liye bhi to fikrmand nahin

ki KHair-KHwah bhi ab kaun sa bacha mere pas

zaban khule to bharam dosti ka jata hai

KHamosh hun ki yahi rasta bacha mere pas

zamana us pe bhi naraaz hai ki le de kar

hawala sirf tere nam ka bacha mere pas