انہیں فکر مرگ و حیات کیا تری رہ گزر میں جو آ گئے

انہیں فکر مرگ و حیات کیا تری رہ گزر میں جو آ گئے

کبھی رہ گزر سے اٹھے اگر تو حیات و موت پہ چھا گئے

وہ شباب کی طرح لمحہ بھر رہے زندگی میں مری مگر

جنہیں عمر بھر نہ مٹا سکا وہ نقوش دل پہ بنا گئے

وہ غم حیات کا سلسلہ کہ محال تھا جسے توڑنا

مجھے کچھ بھی یاد نہیں رہا کبھی یاد وہ اگر آ گئے

جو وہ بے نیاز وفا رہا تو یہ اس کا اپنا شعار تھا

ہمیں بے وفا سے نہیں گلہ کہ ہم اپنا فرض نبھا گئے

نہ ملا ہمیں کوئی راہ بر ملے بند دیر و حرم کے در

یہ جنون شوق کا تھا اثر کہ حریم حسن تک آ گئے

یہی دل تھا جس میں مقیم تھا جسے چھوڑ کر وہ چلا گیا

اسے کون آ کے سنبھالتا ہمیں آئے اشک بہا گئے

نہ ملا جبیں کو جو در ترا تو ملال کیا تو کہاں نہ تھا

جہاں ہم نے سر کو جھکا دیا وہیں سجدہ گاہ بنا گئے

وہ حیات وقف فراق تھی دم مرگ بھی تری یاد تھی

یہی داستان حیات تھی جسے ہچکیوں میں سنا گئے

بہے غم میں اشک تو کیا ہوا ترے دل کا میل تو دھل گیا

جو سمجھ سکے تو سمجھ شفاؔ وہ ہنسا گئے کہ رلا گئے