unhen fikr-e-marg-o-hayat kya teri rahguzar mein jo aa gae

unheñ fikr-e-marg-o-hayāt kyā tirī rahguzar meñ jo aa ga.e

kabhī rahguzar se uThe agar to hayāt-o-maut pe chhā ga.e

vo shabāb kī tarah lamha-bhar rahe zindagī meñ mirī magar

jinheñ 'umr bhar na miTā sakā vo nuqūsh dil pe banā ga.e

vo ġham-e-hayāt kā silsila ki muhāl thā jise toḌnā

mujhe kuchh bhī yaad nahīñ rahā kabhī yaad vo agar aa ga.e

jo vo be-niyāz-e-vafā rahā to ye us kā apnā shi'ār thā

hameñ bevafā se nahīñ gila ki ham apnā farz nibhā ga.e

na milā hameñ koī rāhbar mile band dair-o-haram ke dar

ye junūn-e-shauq kā thā asar ki harīm-e-husn tak aa ga.e

yahī dil thā jis meñ muqīm thā jise chhoḌ kar vo chalā gayā

ise kaun aa ke sañbhāltā hamīñ aa.e ashk bahā ga.e

na milā jabīñ ko jo dar tirā to malāl kyā tū kahāñ na thā

jahāñ ham ne sar ko jhukā diyā vahīñ sajda-gāh banā ga.e

vo hayāt vaqf-e-firāq thī dam-e-marg bhī tirī yaad thī

yahī dāstān-e-hayāt thī jise hichkiyoñ meñ sunā ga.e

bahe ġham meñ ashk to kyā huā tire dil kā mail to dhul gayā

jo samajh sake to samajh 'shifā' vo hañsā ga.e ki rulā ga.e

unhen fikr-e-marg-o-hayat kya teri rahguzar mein jo aa gae

kabhi rahguzar se uThe agar to hayat-o-maut pe chha gae

wo shabab ki tarah lamha-bhar rahe zindagi mein meri magar

jinhen 'umr bhar na miTa saka wo nuqush dil pe bana gae

wo gham-e-hayat ka silsila ki muhaal tha jise toDna

mujhe kuchh bhi yaad nahin raha kabhi yaad wo agar aa gae

jo wo be-niyaz-e-wafa raha to ye us ka apna shi'ar tha

hamein bewafa se nahin gila ki hum apna farz nibha gae

na mila hamein koi rahbar mile band dair-o-haram ke dar

ye junun-e-shauq ka tha asar ki harim-e-husn tak aa gae

yahi dil tha jis mein muqim tha jise chhoD kar wo chala gaya

ise kaun aa ke sanbhaalta hamin aae ashk baha gae

na mila jabin ko jo dar tera to malal kya tu kahan na tha

jahan hum ne sar ko jhuka diya wahin sajda-gah bana gae

wo hayat waqf-e-firaq thi dam-e-marg bhi teri yaad thi

yahi dastan-e-hayat thi jise hichkiyon mein suna gae

bahe gham mein ashk to kya hua tere dil ka mail to dhul gaya

jo samajh sake to samajh 'shifa' wo hansa gae ki rula gae