unhen kya ilm jo hum ko yahan samjhane aae hain

unheñ kyā ilm jo ham ko yahāñ samjhāne aa.e haiñ

ki ham dair-o-haram hote hue maiḳhāne aa.e haiñ

unheñ bhī dekh aa.eñ ik nazar mujh se farmā.eñ

unhīñ par chhoḌtā huuñ jo mujhe samjhāne aa.e haiñ

hameñ pūchho surūr un kā ki ye saaqī kī mast āñkheñ

hamāre zarf se naape hue paimāne aa.e haiñ

agar aa.e haiñ nāseh aa.eñ lekin ye to farmā deñ

samajhne aa.e haiñ ḳhud yā hameñ samjhāne aa.e haiñ

baḌhā chal shauq se ai ishq ke raahī ki is rah par

kahīñ bastī bhī aa.egī agar vīrāne aa.e haiñ

mai-e-gul-gūñ hai saaqī hai 'sahar' vaa.iz se kahtā hai

abhī farmā.eñ mujh se aap jo farmāne aa.e haiñ

unhen kya ilm jo hum ko yahan samjhane aae hain

ki hum dair-o-haram hote hue maiKHane aae hain

unhen bhi dekh aaen ek nazar mujh se farmaen

unhin par chhoDta hun jo mujhe samjhane aae hain

hamein puchho surur un ka ki ye saqi ki mast aankhen

hamare zarf se nape hue paimane aae hain

agar aae hain naseh aaen lekin ye to farma den

samajhne aae hain KHud ya hamein samjhane aae hain

baDha chal shauq se ai ishq ke rahi ki is rah par

kahin basti bhi aaegi agar virane aae hain

mai-e-gul-gun hai saqi hai 'sahar' waiz se kahta hai

abhi farmaen mujh se aap jo farmane aae hain