انہیں کانٹوں سے جو پھولوں کی زباں ہوتے ہیں

انہیں کانٹوں سے جو پھولوں کی زباں ہوتے ہیں

کتنے افسانے گلستاں کے بیاں ہوتے ہیں

میں ہی آوارہ سا پھرتا ہوں کسی کی خاطر

لوگ یوں رات کو سڑکوں پہ کہاں ہوتے ہیں

چھوڑ دیتے ہیں وہاں درد کے کتنے نشتر

ہم غزل خواں تری محفل میں جہاں ہوتے ہیں

ایک حد تک جو بجھا دیتے تھے شعلے دل کے

اب ان آنکھوں میں وہ آنسو بھی کہاں ہوتے ہیں

ایک دنیائے خرد دل سے لپٹ جاتی ہے

ہم جو اس شوخ کی جانب نگراں ہوتے ہیں

ہم وہ اندیشۂ فردا ہیں چمن میں ناظمؔ

گل کے چہرے سے جو ہر آن عیاں ہوتے ہیں