‘uqde khule na mujh pe tere KHad-o-Khaal ke

‘uqde khule na mujh pe tire ḳhad-o-ḳhāl ke

har saañs chal diyā mujhe uljhan meñ Daal ke

jo ḳhud gañvā chukā hai kahīñ 'umr-e-mo'tabar

vo kyā hisāb degā mire māh-o-sāl ke

aa.e the merī bazm meñ kuchh jam sifāt log

jalve na kam hue mire jām-e-sifāl ke

maiñ kyā huuñ sirf itnā hī pūchhā thā ek din

kitne javāb degā mujhe is savāl ke

āñdhī kī tarh aa ke chalā bhī gayā kahīñ

kankar sā koī vo mirī āñkhoñ meñ Daal ke

jo bhī milā thā daulat-e-dil us pe vaar dī

rakkhā na koī maiñ ne ḳhazāna sañbhāl ke

vo aane vaale vaqt ke tevar samajh gayā

maiñ rishte joḌtī rahī maazī ke haal ke

‘uqde khule na mujh pe tere KHad-o-KHal ke

har sans chal diya mujhe uljhan mein Dal ke

jo KHud ganwa chuka hai kahin 'umr-e-mo'tabar

wo kya hisab dega mere mah-o-sal ke

aae the meri bazm mein kuchh jam sifat log

jalwe na kam hue mere jam-e-sifal ke

main kya hun sirf itna hi puchha tha ek din

kitne jawab dega mujhe is sawal ke

aandhi ki tarh aa ke chala bhi gaya kahin

kankar sa koi wo meri aankhon mein Dal ke

jo bhi mila tha daulat-e-dil us pe war di

rakkha na koi main ne KHazana sanbhaal ke

wo aane wale waqt ke tewar samajh gaya

main rishte joDti rahi mazi ke haal ke