urdi-o-dai se pare sud-o-ziyan se aage

urdī-o-dai se pare sūd-o-ziyāñ se aage

aao chal nikleñ kahīñ qaid-e-zamāñ se aage

is ḳharābe meñ abas haiñ ġham-o-shādī donoñ

merī taskīn kā maskan hai makāñ se aage

āh-o-nāla hī sahī ahl-e-vafā kā maslak

ik maqām aur bhī aatā hai fuġhāñ se aage

daar tak saaf nazar aatā hai rishta dekheñ

phir kidhar jaate haiñ ushshāq vahāñ se aage

ḳhūn-ālūda kafan shāreh-e-sad-daftar-e-dil

tarz-e-iz.hār hai ik aur zabāñ se aage

fikr maflūj jo zindānī-e-aflāk rahe

tiir be-kār jo nikle na kamāñ se aage

thī bahut ḳhāna-ḳharābī ko hamārī ye umr

ik jahāñ aur bhī sunte haiñ yahāñ se aage

maiñ ki huuñ hāzir-o-maujūd ke vasvās meñ qaid

tū ki hai parda-nashīñ vahm-o-gumāñ se aage

urdi-o-dai se pare sud-o-ziyan se aage

aao chal niklen kahin qaid-e-zaman se aage

is KHarabe mein abas hain gham-o-shadi donon

meri taskin ka maskan hai makan se aage

aah-o-nala hi sahi ahl-e-wafa ka maslak

ek maqam aur bhi aata hai fughan se aage

dar tak saf nazar aata hai rishta dekhen

phir kidhar jate hain ushshaq wahan se aage

KHun-aluda kafan shaareh-e-sad-daftar-e-dil

tarz-e-izhaar hai ek aur zaban se aage

fikr mafluj jo zindani-e-aflak rahe

tir be-kar jo nikle na kaman se aage

thi bahut KHana-KHarabi ko hamari ye umr

ek jahan aur bhi sunte hain yahan se aage

main ki hun hazir-o-maujud ke waswas mein qaid

tu ki hai parda-nashin wahm-o-guman se aage