عریانیت کی اوج ثریا میں پھنس گئے

عریانیت کی اوج ثریا میں پھنس گئے

وحشت میں لوگ رقص برہنہ میں پھنس گئے

دنیا جو دی تھی رب نے ہمیں اس کو چھوڑ کر

ہم لوگ جانے کون سی دنیا میں پھنس گئے

یہ سوچ کر کہ ظل الٰہی ہوں خیر خواہ

اچھے بھلے بھی قبلہ و کعبہ میں پھنس گئے

پھنسنا ہی جن کے اپنے مقدر کا کھیل تھا

اک دشت سے وہ نکلے تو صحرا میں پھنس گئے

ساحل پہ بھی ہے خوب بھنور جیسا اہتمام

آخر ہم آ کے کون سے دریا میں پھنس گئے

یہ بھول کر کہ کیسے سنورتی ہے عاقبت

سب اپنی اپنی خواہش بے جا میں پھنس گئے

شاہدؔ رموز شاعری لائیں کہاں سے ہم

مطلع ہوا تو آج بھی ایطا میں پھنس گئے