us bewafa ne lauT ke aana to hai nahin

us bevafā ne lauT ke aanā to hai nahīñ

ab us ke paas koī bahāna to hai nahīñ

mañDlā.eñ kyoñ na ye mire āñgan ke ās-pās

in panchhiyoñ kā koī Thikāna to hai nahīñ

kab tak tumhārī yaad meñ dāman bhigo.eñ ham

āñkhoñ meñ āñsuoñ kā ḳhazāna to hai nahīñ

jo baat bhī kareñge kareñge yaqīñ ke saath

ham ne havā meñ tiir chalānā to hai nahīñ

sharmā rahe ho kis liye lab kholte hue

ab vo hamāre vaalā zamāna to hai nahīñ

mahfil meñ husn kī mirā jaanā fuzūl hai

tum sā vahāñ koī nazar aanā to hai nahīñ

dil pe jo biitī hai sunāne kā fā.eda

aañsū kisī kī aañkh meñ aanā to hai nahīñ

is vāste maiñ tum se huā huuñ kināra-kash

kashtī ko tum ne paar lagānā to hai nahīñ

jitnī tumhārā dil kare utnī pilāo aaj

is baar ham ne hosh meñ aanā to hai nahīñ

'rāhī' vo is liye kabhī hote nahīñ ḳhafā

vo jānte haiñ ham ne manānā to hai nahīñ

us bewafa ne lauT ke aana to hai nahin

ab us ke pas koi bahana to hai nahin

manDlaen kyon na ye mere aangan ke aas-pas

in panchhiyon ka koi Thikana to hai nahin

kab tak tumhaari yaad mein daman bhigoen hum

aankhon mein aansuon ka KHazana to hai nahin

jo baat bhi karenge karenge yaqin ke sath

hum ne hawa mein tir chalana to hai nahin

sharma rahe ho kis liye lab kholte hue

ab wo hamare wala zamana to hai nahin

mahfil mein husn ki mera jaana fuzul hai

tum sa wahan koi nazar aana to hai nahin

dil pe jo biti hai sunane ka faeda

aansu kisi ki aankh mein aana to hai nahin

is waste main tum se hua hun kinara-kash

kashti ko tum ne par lagana to hai nahin

jitni tumhaara dil kare utni pilao aaj

is bar hum ne hosh mein aana to hai nahin

'rahi' wo is liye kabhi hote nahin KHafa

wo jaante hain hum ne manana to hai nahin