us darbar mein lazim tha apne sar ko KHam karte

us darbār meñ lāzim thā apne sar ko ḳham karte

varna kam-az-kam apnī āvāz hī maddham karte

is kī anā taskīn nahīñ paatī ḳhālī lafzoñ se

shāyad kuchh ho jaatā asar tum girya-e-paiham karte

siikh liyā hai āḳhir ham ne ishq meñ ḳhush ḳhush rahnā

dard ko apnī davā banāte zaḳhm ko marham karte

kaam hamāre hisse ke sab kar gayā thā divāna

kaun sā aisā kaam thā baaqī jis ko ab ham karte

har jaane vaale ko dekh ke rakh liyā dil par patthar

kis kis ko rote āḳhir kis kis kā mātam karte

dil to hamārā jise patthar se bhī saḳht huā thā

patthar paanī ho gayā sūkhī āñkhoñ ko nam karte

ban jaatā tiryāq usī kā zahr agar tum 'haidar'

koī aayat pyaar kī paḌhte aur us par dam karte

us darbar mein lazim tha apne sar ko KHam karte

warna kam-az-kam apni aawaz hi maddham karte

is ki ana taskin nahin pati KHali lafzon se

shayad kuchh ho jata asar tum girya-e-paiham karte

sikh liya hai aaKHir hum ne ishq mein KHush KHush rahna

dard ko apni dawa banate zaKHm ko marham karte

kaam hamare hisse ke sab kar gaya tha diwana

kaun sa aisa kaam tha baqi jis ko ab hum karte

har jaane wale ko dekh ke rakh liya dil par patthar

kis kis ko rote aaKHir kis kis ka matam karte

dil to hamara jise patthar se bhi saKHt hua tha

patthar pani ho gaya sukhi aankhon ko nam karte

ban jata tiryaq usi ka zahr agar tum 'haidar'

koi aayat pyar ki paDhte aur us par dam karte