us dasht ka jo rabta hai tishnagi ke sath

us dasht kā jo rābta hai tishnagī ke saath

tū ḳhush rahe duā hai magar ik kamī ke saath

tujh se bichhaḌ ke ham mare to jaañ nahīñ magar

phir kar liye ye fāsle aur zindagī ke saath

DhūñDh ab shajar pahāḌ parinde havā kahīñ

uktā gayā hai aadmī ab aadmī ke saath

vo silsila ajiib thā tanhā.ī kā mirī

sab ke rahe qarīb magar dushmanī ke saath

ronā na dhonā jhagḌā na koī shikāyateñ

vo rishta toḌ bhī gayā to sādgī ke saath

sab sochte rahe ki mohabbat hī chhoḌ dī

pakḌā gayā vo krishn usī bāñsurī ke saath

guzrā jo koī apne bhī ghar phir nahīñ gayā

hai kaun sā ye rishta tirī us galī ke saath

ek ek yaad terī pighaltī hai barf sī

kyā hī maza sharāb kā hai tīrgī ke saath

uTh kar chalā gayā vo kahīñ aur bazm se

achchhā nahīñ huā ye mirī shā.irī ke saath

us dasht ka jo rabta hai tishnagi ke sath

tu KHush rahe dua hai magar ek kami ke sath

tujh se bichhaD ke hum mare to jaan nahin magar

phir kar liye ye fasle aur zindagi ke sath

DhunDh ab shajar pahaD parinde hawa kahin

ukta gaya hai aadmi ab aadmi ke sath

wo silsila ajib tha tanhai ka meri

sab ke rahe qarib magar dushmani ke sath

rona na dhona jhagDa na koi shikayaten

wo rishta toD bhi gaya to sadgi ke sath

sab sochte rahe ki mohabbat hi chhoD di

pakDa gaya wo krishn usi bansuri ke sath

guzra jo koi apne bhi ghar phir nahin gaya

hai kaun sa ye rishta teri us gali ke sath

ek ek yaad teri pighalti hai barf si

kya hi maza sharab ka hai tirgi ke sath

uTh kar chala gaya wo kahin aur bazm se

achchha nahin hua ye meri shairi ke sath