اس ایک بات کا ہوتا رہا ملال مجھے

اس ایک بات کا ہوتا رہا ملال مجھے

کہ تھک رہا تھا وہ مشکل میں ڈال ڈال مجھے

اسی سبب میں تبسم کا پیرہن پہنوں

کہ اس میں غم بھی مرا کہتا ہے کمال مجھے

کوئی توقع نہ رکھا کرو کبھی مجھ سے

خود اپنا ہی نہیں رہتا کوئی خیال مجھے

تجھے بھلا کے بھی خود کو نہ یاد کر پائی

عجیب روگ نے رکھا ہے کب سے پال مجھے

مرے سوا مرے بھیتر کوئی یقیناً ہے

پکارتا ہے جو اکثر کہ اب نکال مجھے

بھلا رکا ہے یہاں کون وقت آنے پر

نہ روک پائے گا دنیا ترا جمال مجھے

میں آج ہو ہی گئی خود سے دیکھ لے بیزار

کہا تھا میں نے کہ اتنا نہیں سنبھال مجھے