اس گل بدن کا راز بہاروں سے پوچھئے

اس گل بدن کا راز بہاروں سے پوچھئے

پھولوں سے پوچھئے کہ نظاروں سے پوچھئے

ہر دم یقیں خدا پہ ہی رکھئے تمام عمر

احوال زیست اپنا نہ تاروں سے پوچھئے

کاسہ بدست کتنے ہیں شہروں میں گاؤں میں

غربت کی لمبی لمبی قطاروں سے پوچھئے

لب کھولنے میں ہوتا ہے رسوائیوں کا ڈر

جو کچھ بھی پوچھنا ہے اشاروں سے پوچھئے

آئے گا کب کسی کو یقیں میری بات پر

میری حقیقتیں مرے یاروں سے پوچھئے

ساحرؔ نہ ان سے پوچھئے جن کو نہیں ہے قدر

کیا شے ہے ماں یہ ماں کے دلاروں سے پوچھئے