us ek ummid ko to rahat-e-safar na samajh

us ik ummīd ko to rāhat-e-safar na samajh

hai rāste meñ kahīñ sāya-e-shajar na samajh

jo sāmne na rahā us kā aks aañkh meñ hai

ab itnā ḳhālī bhī ye kāsa-e-nazar na samajh

jo ruuh meñ na utar jaa.e vo jamāl nahīñ

jo dil-gudāz na kar de use hunar na samajh

nazar parakh dil-e-majrūh nashtaroñ pe na jā

har aane vaale ko tū apnā chāragar na samajh

jo fasl-e-gul kī tamannā meñ ho ga.e barbād

vo bā-murād haiñ ġham un kā be-samar na samajh

har ek ghar meñ na jab tak charāġh jal jaa.e

'kamāl' raushan-o-ābād apnā ghar na samajh

us ek ummid ko to rahat-e-safar na samajh

hai raste mein kahin saya-e-shajar na samajh

jo samne na raha us ka aks aankh mein hai

ab itna KHali bhi ye kasa-e-nazar na samajh

jo ruh mein na utar jae wo jamal nahin

jo dil-gudaz na kar de use hunar na samajh

nazar parakh dil-e-majruh nashtaron pe na ja

har aane wale ko tu apna chaaragar na samajh

jo fasl-e-gul ki tamanna mein ho gae barbaad

wo ba-murad hain gham un ka be-samar na samajh

har ek ghar mein na jab tak charagh jal jae

'kamal' raushan-o-abaad apna ghar na samajh