us ka aaghaz hua jaane kahan se pahle

us kā āġhāz huā jaane kahāñ se pahle

ek allāh thā taḳhlīq-e-jahāñ se pahle

dekhiye izn-e-sahar hogā kahāñ se pahle

shankh-dhun se ki muazzin kī azaañ se pahle

dil meñ ik aag sī thī ashk-e-ravāñ se pahle

huī ulfat kī shurūāt yahāñ se pahle

un ke laḌne meñ bhī hai sulh kā pahlū ai dil

lāzmī jang bhī hai amn-o-amāñ se pahle

haal kyā pūchhte ho mujh se mirā chāragaro

dil meñ ik dard sā thā soz-e-nihāñ se pahle

ab nahīñ koī bhī armān mire is dil meñ

luT gayā hai ye chaman bād-e-ḳhizāñ se pahle

vo haiñ maġhrūr udhar ham bhī haiñ ḳhud.dār idhar

dekhiye hogī shurūāt kahāñ se pahle

sher mauqūf nahīñ lafz-o-bayāñ par 'gauhar'

koī mazmūn bhī to lafz-e-bayāñ se pahle

us ka aaghaz hua jaane kahan se pahle

ek allah tha taKHliq-e-jahan se pahle

dekhiye izn-e-sahar hoga kahan se pahle

shankh-dhun se ki muazzin ki azan se pahle

dil mein ek aag si thi ashk-e-rawan se pahle

hui ulfat ki shuruat yahan se pahle

un ke laDne mein bhi hai sulh ka pahlu ai dil

lazmi jang bhi hai amn-o-aman se pahle

haal kya puchhte ho mujh se mera chaaragaro

dil mein ek dard sa tha soz-e-nihan se pahle

ab nahin koi bhi arman mere is dil mein

luT gaya hai ye chaman baad-e-KHizan se pahle

wo hain maghrur udhar hum bhi hain KHuddar idhar

dekhiye hogi shuruat kahan se pahle

sher mauquf nahin lafz-o-bayan par 'gauhar'

koi mazmun bhi to lafz-e-bayan se pahle