اس کا اب کوئی پوچھتا ہی نہیں

اس کا اب کوئی پوچھتا ہی نہیں

جس کا دنیا میں کچھ بچا ہی نہیں

ایک رستے میں راستے ہیں ہزار

ایک منزل کا راستہ ہی نہیں

غیر کے درد ہی کو سہتا ہوں

درد اپنا کبھی سہا ہی نہیں

ہم سفر پر نکل پڑے لیکن

کہاں جانا ہے یہ پتا ہی نہیں

آج اس سے ہوا کل اس سے ہوا

عشق کی کوئی انتہا ہی نہیں

اس کی اب یاد آ رہی ہے تمہیں

کوئی دنیا میں جب رہا ہی نہیں

عشق کا بھی عجیب سلسلہ ہے

آج تک جس کا سلسلہ ہی نہیں

میں فقط زندگی گزارتا ہوں

مجھ میں جینے کا حوصلہ ہی نہیں

مجھ کو اس سے نقیؔ جو کہنا تھا

میں نے اس سے کبھی کہا ہی نہیں