us ka ab koi puchhta hi nahin

us kā ab koī pūchhtā hī nahīñ

jis kā duniyā meñ kuchh bachā hī nahīñ

ek raste meñ rāste haiñ hazār

ek manzil kā rāsta hī nahīñ

ġhair ke dard hī ko sahtā huuñ

dard apnā kabhī sahā hī nahīñ

ham safar par nikal paḌe lekin

kahāñ jaanā hai ye patā hī nahīñ

aaj is se huā kal us se huā

'ishq kī koī intihā hī nahīñ

us kī ab yaad aa rahī hai tumheñ

koī duniyā meñ jab rahā hī nahīñ

'ishq kā bhī 'ajīb silsila hai

aaj tak jis kā silsila hī nahīñ

maiñ faqat zindagī guzārtā huuñ

mujh meñ jiine kā hausla hī nahīñ

mujh ko us se 'naqī' jo kahnā thā

maiñ ne us se kabhī kahā hī nahīñ

us ka ab koi puchhta hi nahin

jis ka duniya mein kuchh bacha hi nahin

ek raste mein raste hain hazar

ek manzil ka rasta hi nahin

ghair ke dard hi ko sahta hun

dard apna kabhi saha hi nahin

hum safar par nikal paDe lekin

kahan jaana hai ye pata hi nahin

aaj is se hua kal us se hua

'ishq ki koi intiha hi nahin

us ki ab yaad aa rahi hai tumhein

koi duniya mein jab raha hi nahin

'ishq ka bhi 'ajib silsila hai

aaj tak jis ka silsila hi nahin

main faqat zindagi guzarta hun

mujh mein jine ka hausla hi nahin

mujh ko us se 'naqi' jo kahna tha

main ne us se kabhi kaha hi nahin