us ka anjam bhala ho ki bura ho kuchh ho

us kā anjām bhalā ho ki burā ho kuchh ho

ab re.āyā hameñ rahnā nahīñ shāho kuchh ho

zaḳhm kā ek sā ye rañg nahīñ bhātā hai

ab to ye Thiik ho yā aur harā ho kuchh ho

band yādoñ ke havālāt meñ kab tak rahūñ maiñ

yā maiñ ho jā.ūñ barī yā to sazā ho kuchh ho

jism kahtā hai ki ab jaañ se guzar hī jaao

dil ye kahtā hai ki ye rishta nibāho kuchh ho

be-parastish bashariyyat nahīñ rah saktī hai

but ho mahbūb ho duniyā ho ḳhudā ho kuchh ho

ab to bistar se ye bīmār uThā chāhtā hai

kuchh to do zahr-e-halāhal ho davā ho kuchh ho

ziist 'arshad' baḌī be-kaif huī jaatī hai

chāhiye dard purānā ho nayā ho kuchh ho

us ka anjam bhala ho ki bura ho kuchh ho

ab reaya hamein rahna nahin shaho kuchh ho

zaKHm ka ek sa ye rang nahin bhata hai

ab to ye Thik ho ya aur hara ho kuchh ho

band yaadon ke hawalat mein kab tak rahun main

ya main ho jaun bari ya to saza ho kuchh ho

jism kahta hai ki ab jaan se guzar hi jao

dil ye kahta hai ki ye rishta nibaho kuchh ho

be-parastish bashariyyat nahin rah sakti hai

but ho mahbub ho duniya ho KHuda ho kuchh ho

ab to bistar se ye bimar uTha chahta hai

kuchh to do zahr-e-halahal ho dawa ho kuchh ho

zist 'arshad' baDi be-kaif hui jati hai

chahiye dard purana ho naya ho kuchh ho