اس کا چہرہ ہے کہ بھولا ہوا منظر جیسے

اس کا چہرہ ہے کہ بھولا ہوا منظر جیسے

میری آنکھوں میں یہ آنسو بھی ہیں پتھر جیسے

ایک سایہ مرے قدموں سے لپٹ جاتا ہے

شام ہوتے ہی مری چھت سے اتر کر جیسے

ساحل دل پہ پٹختا ہے بہت سر اپنا

رات بھر تیرے خیالوں کا سمندر جیسے

یہ الگ بات کہ دیکھا نہیں اس کو اب تک

پھر بھی رہتا ہے مرے ساتھ وہ اکثر جیسے

گھنٹیاں بجتی ہیں اب ذہن کے دروازے پر

مسجدیں ٹوٹ رہی ہوں مرے اندر جیسے

زندگی قید ہوں میں اپنے بدن کے اندر

اور بلاتا ہے کوئی جسم سے باہر جیسے