اس کا مزاج برہم جو بانیٔ جفا ہے

اس کا مزاج برہم جو بانیٔ جفا ہے

کٹنے کو ہے کوئی سر پھر یار لب کشا ہے

چھپ چھپ کے جھانکتے ہو چلمن کی آڑ لے کر

جو بولتے نہیں تم وہ سب مجھے پتا ہے

پھر یاد آ رہی ہے ان کی بچھڑ گئے جو

چھیڑو نہ آج مجھ کو دل کچھ بجھا بجھا ہے

کیا پوچھتے ہو ان کی غمزہ طرازیوں کا

اس دل کا امتحاں ہے جو بھی نئی ادا ہے

اک مہر خامشی ہے ہونٹوں پہ جو لگی ہے

قدموں کی آہٹوں کو دل گوش بر صدا ہے

بے لطف ہو گئی ہے اب زندگی ہماری

لگتا ہے بس یہی اب دل زیست سے خفا ہے

کہتا ہے درد دل کو نا قابل مداوا

پوچھو اسے ذرا وہ کس مرض کی دوا ہے

کیوں بار بار مجھ سے وہ پوچھتے ہیں یارو

حالانکہ جانتے ہیں جو نفس مدعا ہے

کنج قفس میں یارو رہنے دو آج مجھ کو

سینہ دریدہ میں پھر درد آج کچھ سوا ہے

یادیں نہیں رلاتیں ایام رفتہ کی اب

تھا جو چراغ خستہ اک طاق پر رکھا ہے

آغوش عشق میں ہی سالکؔ تری بقا ہے

غنچے کی مسکراہٹ اس کے لیے فنا ہے