us ka mizaj-e-barham jo bani-e-jafa hai

us kā mizāj-e-barham jo bānī-e-jafā hai

kaTne ko hai koī sar phir yaar lab-kushā hai

chhup-chhup ke jhāñkte ho chilman kī aaḌ le kar

jo bolte nahīñ tum vo sab mujhe patā hai

phir yaad aa rahī hai un kī bichhaḌ ga.e jo

chheḌo na aaj mujh ko dil kuchh bujhā bujhā hai

kyā pūchhte ho un kī ġhamza-tarāziyoñ kā

is dil kā imtihāñ hai jo bhī na.ī adā hai

ik mohr-e-ḳhāmushī hai hoñToñ pe jo lagī hai

qadmoñ kī āhaToñ ko dil gosh-bar-sadā hai

be-lutf ho ga.ī hai ab zindagī hamārī

lagtā hai bas yahī ab dil ziist se ḳhafā hai

kahtā hai dard-e-dil ko nā-qābil-e-mudāvā

pūchho use zarā vo kis marz kī davā hai

kyoñ baar baar mujh se vo pūchhte haiñ yaaro

hālāñki jānte haiñ jo nafs-e-mudda'ā hai

kunj-e-qafas meñ yaaro rahne do aaj mujh ko

siina darīda meñ phir dard aaj kuchh sivā hai

yādeñ nahīñ rulātīñ ayyām-e-rafta kī ab

thā jo charāġh-e-ḳhasta ik taaq par rakhā hai

āġhosh-e-‘ishq meñ hī 'sālik' tirī baqā hai

ġhunche kī muskurāhaT us ke liye fanā hai

us ka mizaj-e-barham jo bani-e-jafa hai

kaTne ko hai koi sar phir yar lab-kusha hai

chhup-chhup ke jhankte ho chilman ki aaD le kar

jo bolte nahin tum wo sab mujhe pata hai

phir yaad aa rahi hai un ki bichhaD gae jo

chheDo na aaj mujh ko dil kuchh bujha bujha hai

kya puchhte ho un ki ghamza-taraaziyon ka

is dil ka imtihan hai jo bhi nai ada hai

ek mohr-e-KHamushi hai honTon pe jo lagi hai

qadmon ki aahaTon ko dil gosh-bar-sada hai

be-lutf ho gai hai ab zindagi hamari

lagta hai bas yahi ab dil zist se KHafa hai

kahta hai dard-e-dil ko na-qabil-e-mudawa

puchho use zara wo kis marz ki dawa hai

kyon bar bar mujh se wo puchhte hain yaro

haalanki jaante hain jo nafs-e-mudda'a hai

kunj-e-qafas mein yaro rahne do aaj mujh ko

sina darida mein phir dard aaj kuchh siwa hai

yaaden nahin rulatin ayyam-e-rafta ki ab

tha jo charagh-e-KHasta ek taq par rakha hai

aaghosh-e-‘ishq mein hi 'salik' teri baqa hai

ghunche ki muskurahaT us ke liye fana hai