us ka rutba har ek shaKHs se baala hai

us kā rutba har ik shaḳhs se baalā hai

jis ke lab par tere naam kī maalā hai

dastak dene vaale tujh ko ilm nahīñ

darvāze kī donoñ jānib taalā hai

kis ke ġham meñ phuul jhulasne lagte haiñ

kaun yahāñ pe kaliyāñ toḌne vaalā hai

kis kī aamad par ḳhushbueñ phuuT paḌīñ

merī bastī meñ har samt ujālā hai

hamdardī kis shaḳhs ko merī zaat se hai

kaun mirī tanhā.ī bāñTne vaalā hai

tum ne mujh ko chhoḌ diyā hai tan-e-tanhā

niilī chhat vaalā merā rakhvālā hai

mujh ko gar pahchān nahīñ paa.e ho tum

maiñ ne apnā sab kuchh sher meñ Dhālā hai

baiThā hai munDer pe aa kar muddat se

tū ne jis panchhī ko daana Daalā hai

us būḌhī kā haal nahīñ batlā saktā

jis ne ḳhuun jigar kā de kar paalā hai

kis ko maiñ mīrās atā kar saktā huuñ

kaun mire dukh-dard sañbhālne vaalā hai

us ka rutba har ek shaKHs se baala hai

jis ke lab par tere nam ki mala hai

dastak dene wale tujh ko ilm nahin

darwaze ki donon jaanib tala hai

kis ke gham mein phul jhulasne lagte hain

kaun yahan pe kaliyan toDne wala hai

kis ki aamad par KHushbuen phuT paDin

meri basti mein har samt ujala hai

hamdardi kis shaKHs ko meri zat se hai

kaun meri tanhai banTne wala hai

tum ne mujh ko chhoD diya hai tan-e-tanha

nili chhat wala mera rakhwala hai

mujh ko gar pahchan nahin pae ho tum

main ne apna sab kuchh sher mein Dhaala hai

baiTha hai munDer pe aa kar muddat se

tu ne jis panchhi ko dana Dala hai

us buDhi ka haal nahin batla sakta

jis ne KHun jigar ka de kar pala hai

kis ko main miras ata kar sakta hun

kaun mere dukh-dard sanbhaalne wala hai