us ka tabassum us ka tarannum uski tajalli pae to

us kā tabassum us kā tarannum us kī tajallī paa.e to

prem-pujārī prem-nagar tak manzil manzil jaa.e to

nāseh-e-mushfiq tujh ko mubārak kausar-o-jannat hūr-o-malak

ham ko dil se naaz hai is par ham un ke kahlā.e to

zarra zarra is duniyā kā dīda-o-dil rakhtā hai magar

ahl-e-ḳhirad phir chup-chup kyoñ haiñ koī hameñ batlā.e to

suukh rahī hai kyārī kyārī suunā suunā gulshan hai

sabza-o-gul phir raqs kareñge fasl-e-bahārāñ aa.e to

Daalī Daalī jhuum rahī hai ek hue haiñ do dil aaj

un kī merī prem-kahānī kaash amar ho jaa.e to

ham haiñ un ke pūjne vaale nisbat un se rakhte haiñ

phir ye tabāhī kyoñ hai ham par koī hameñ batlā.e to

rind nahīñ do ghūñT jo pī kar bahkī bāteñ karte haiñ

dekhnā merā zarf bhī saaqī rang pe mahfil aa.e to

us ka tabassum us ka tarannum us ki tajalli pae to

prem-pujari prem-nagar tak manzil manzil jae to

naseh-e-mushfiq tujh ko mubarak kausar-o-jannat hur-o-malak

hum ko dil se naz hai is par hum un ke kahlae to

zarra zarra is duniya ka dida-o-dil rakhta hai magar

ahl-e-KHirad phir chup-chup kyon hain koi hamein batlae to

sukh rahi hai kyari kyari suna suna gulshan hai

sabza-o-gul phir raqs karenge fasl-e-bahaaran aae to

Dali Dali jhum rahi hai ek hue hain do dil aaj

un ki meri prem-kahani kash amar ho jae to

hum hain un ke pujne wale nisbat un se rakhte hain

phir ye tabahi kyon hai hum par koi hamein batlae to

rind nahin do ghunT jo pi kar bahki baaten karte hain

dekhna mera zarf bhi saqi rang pe mahfil aae to