uske andaz pe mera wo luTana dil ka

us ke andāz pe merā vo luTānā dil kā

yaad hai dil ko abhī tak vo zamāna dil kā

vo tirī shoḳh hasīñ nīm-ḳhayālī āñkheñ

kitnā mushkil thā mujhe un se bachānā dil kā

ab tirī baat meñ vo baat nahīñ hai ai dost

ab nahīñ sahl tirī baat meñ aanā dil kā

dil bhī merā na rahā diiñ bhī gayā duniyā bhī

paḌ gayā bhārī mujhe tujh se lagānā dil kā

tere hone se hasīñ hai ye kahānī dil kī

tere hone se hai ābād fasāna dil kā

kaise ham ġhair ko is dil meñ jagah deñ bolo

us kī yādoñ se bharā rahtā hai ḳhāna dil kā

jo mirī ziist kā hāsil hai vahī hai logo

maiñ ne us par hī luTāyā hai ḳhazāna dil kā

kyā hī 'ālam ho mire sāmne vo baiThe hoñ

aur maiñ gā.ūñ sar-e-bazm tarāna dil kā

vo bhī ik vaqt 'sahar' dil pe mire guzrā thā

maiñ ne dekhā thā kabhī daur suhānā dil kā

us ke andaz pe mera wo luTana dil ka

yaad hai dil ko abhi tak wo zamana dil ka

wo teri shoKH hasin nim-KHayali aankhen

kitna mushkil tha mujhe un se bachana dil ka

ab teri baat mein wo baat nahin hai ai dost

ab nahin sahl teri baat mein aana dil ka

dil bhi mera na raha din bhi gaya duniya bhi

paD gaya bhaari mujhe tujh se lagana dil ka

tere hone se hasin hai ye kahani dil ki

tere hone se hai aabaad fasana dil ka

kaise hum ghair ko is dil mein jagah den bolo

us ki yaadon se bhara rahta hai KHana dil ka

jo meri zist ka hasil hai wahi hai logo

main ne us par hi luTaya hai KHazana dil ka

kya hi 'alam ho mere samne wo baiThe hon

aur main gaun sar-e-bazm tarana dil ka

wo bhi ek waqt 'sahar' dil pe mere guzra tha

main ne dekha tha kabhi daur suhana dil ka