اس کے انداز پہ میرا وہ لٹانا دل کا

اس کے انداز پہ میرا وہ لٹانا دل کا

یاد ہے دل کو ابھی تک وہ زمانہ دل کا

وہ تری شوخ حسیں نیم خیالی آنکھیں

کتنا مشکل تھا مجھے ان سے بچانا دل کا

اب تری بات میں وہ بات نہیں ہے اے دوست

اب نہیں سہل تری بات میں آنا دل کا

دل بھی میرا نہ رہا دیں بھی گیا دنیا بھی

پڑ گیا بھاری مجھے تجھ سے لگانا دل کا

تیرے ہونے سے حسیں ہے یہ کہانی دل کی

تیرے ہونے سے ہے آباد فسانہ دل کا

کیسے ہم غیر کو اس دل میں جگہ دیں بولو

اس کی یادوں سے بھرا رہتا ہے خانہ دل کا

جو مری زیست کا حاصل ہے وہی ہے لوگو

میں نے اس پر ہی لٹایا ہے خزانہ دل کا

کیا ہی عالم ہو مرے سامنے وہ بیٹھے ہوں

اور میں گاؤں سر بزم ترانہ دل کا

وہ بھی اک وقت سحرؔ دل پہ مرے گزرا تھا

میں نے دیکھا تھا کبھی دور سہانا دل کا