us ke ġhamoñ se dil ko phir ābād kyā kareñ
jis ko bhulā diyā hai use yaad kyā kareñ
us ne hī zulm Dhaa.e haiñ munsif bhī hai vahī
ham jā ke us ke sāmne fariyād kyā kareñ
qaid-e-qafas meñ hai vo magar āshiyāñ se duur
jab bāl-o-par nahīñ use āzād kyā kareñ
tāb-e-nazāra hai na majāl-e-kalām hai
pesh-e-jamāl-e-husn kuchh irshād kyā kareñ
dāman jab un kā chhūT gayā apne haath se
baaqī jo ashk haiñ unheñ barbād kyā kareñ
miltī thī jis se dād-e-sitam jab vahī nahīñ
dil bujh gayā hai ab sitam-ījād kyā kareñ
jab duur the to yaad bhī aate the baar baar
ab apne sāmne ho tumheñ yaad kyā kareñ
ham ko satā ke ḳhush vo agar hai to ḳhush rahe
us ko satā ke ham use nāshād kyā kareñ
gulshan meñ aane de na giraftār hī kare
tū hī batā ham aise meñ sayyād kyā kareñ
duniyā se haT gayā hai 'musavvir' hamārā dil
barbādiyāñ jo dekhī haiñ irshād kyā kareñ
us ke ghamon se dil ko phir aabaad kya karen
jis ko bhula diya hai use yaad kya karen
us ne hi zulm Dhae hain munsif bhi hai wahi
hum ja ke us ke samne fariyaad kya karen
qaid-e-qafas mein hai wo magar aashiyan se dur
jab baal-o-par nahin use aazad kya karen
tab-e-nazara hai na majal-e-kalam hai
pesh-e-jamal-e-husn kuchh irshad kya karen
daman jab un ka chhuT gaya apne hath se
baqi jo ashk hain unhen barbaad kya karen
milti thi jis se dad-e-sitam jab wahi nahin
dil bujh gaya hai ab sitam-ijad kya karen
jab dur the to yaad bhi aate the bar bar
ab apne samne ho tumhein yaad kya karen
hum ko sata ke KHush wo agar hai to KHush rahe
us ko sata ke hum use nashad kya karen
gulshan mein aane de na giraftar hi kare
tu hi bata hum aise mein sayyaad kya karen
duniya se haT gaya hai 'musawwir' hamara dil
barbaadiyan jo dekhi hain irshad kya karen
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
