uske hisar-e-KHwab ko mat karb-e-zat kar

us ke hisār-e-ḳhvāb ko mat karb-e-zāt kar

is ḳhushbū-e-ḳhayāl ko tū kā.enāt kar

dil kab talak judā.ī kī shāmeñ manā.egā

merī taraf kabhī to nasīm-e-hayāt kar

maiñ ik tavīl rāste par huuñ khaḌī huī

yā habs-e-tīrgī le yā hāthoñ meñ haath kar

dhīme suroñ meñ chheḌ ke phir sāz-e-zindagī

tū mere lahje meñ bhī kabhī mujh se baat kar

vo hijrateñ hoñ, hijr ho yā qissa-e-visāl

aa phir se mere naam sabhī vāqi.āt kar

pairoñ se us ke naam ke raste lipaT ga.e

ab to yaqīñ ke shahr meñ 'nāhīd' raat kar

us ke hisar-e-KHwab ko mat karb-e-zat kar

is KHushbu-e-KHayal ko tu kaenat kar

dil kab talak judai ki shamen manaega

meri taraf kabhi to nasim-e-hayat kar

main ek tawil raste par hun khaDi hui

ya habs-e-tirgi le ya hathon mein hath kar

dhime suron mein chheD ke phir saz-e-zindagi

tu mere lahje mein bhi kabhi mujh se baat kar

wo hijraten hon, hijr ho ya qissa-e-visal

aa phir se mere nam sabhi waqiat kar

pairon se us ke nam ke raste lipaT gae

ab to yaqin ke shahr mein 'nahid' raat kar