uske hote uTha saka kab sar koi

us ke hote uThā sakā kab sar koī

sarkā de ākāsh kī ye chādar koī

baras rahe haiñ sang-e-malāmat har jānib

kaise nikle ab ghar se bāhar koī

ik duuje ko kaaT rahā hai har rasta

khaḌā huā hai chaurāhe par har koī

kāñch kī kaayā le kar niklā huuñ ghar se

aa na lage bhūlā-bhaTkā patthar koī

chhoḌ gayā raddī ke dāmoñ bikne ko

chaaT gayā mujh ko akshar akshar koī

bāhar DhūñD rahe ho tum kis dushman ko

chhupā huā hai apne hī andar koī

koī bhuul chukā hogā shāyad ham ko

yaad nahīñ aatā hai ab aksar koī

bulā rahā hai jangal jangal sannāTā

bhaTak rahā hai tanhā nagar nagar koī

kaan lagā.e aañkh bichhā.e baiThā huuñ

gayā hai jab se aane ko kah kar koī

us ke hote uTha saka kab sar koi

sarka de aakash ki ye chadar koi

baras rahe hain sang-e-malamat har jaanib

kaise nikle ab ghar se bahar koi

ek duje ko kaT raha hai har rasta

khaDa hua hai chaurahe par har koi

kanch ki kaya le kar nikla hun ghar se

aa na lage bhula-bhaTka patthar koi

chhoD gaya raddi ke damon bikne ko

chaT gaya mujh ko akshar akshar koi

bahar DhunD rahe ho tum kis dushman ko

chhupa hua hai apne hi andar koi

koi bhul chuka hoga shayad hum ko

yaad nahin aata hai ab aksar koi

bula raha hai jangal jangal sannaTa

bhaTak raha hai tanha nagar nagar koi

kan lagae aankh bichhae baiTha hun

gaya hai jab se aane ko kah kar koi