اس کے ہوتے اٹھا سکا کب سر کوئی

اس کے ہوتے اٹھا سکا کب سر کوئی

سرکا دے آکاش کی یہ چادر کوئی

برس رہے ہیں سنگ ملامت ہر جانب

کیسے نکلے اب گھر سے باہر کوئی

اک دوجے کو کاٹ رہا ہے ہر رستہ

کھڑا ہوا ہے چوراہے پر ہر کوئی

کانچ کی کایا لے کر نکلا ہوں گھر سے

آ نہ لگے بھولا بھٹکا پتھر کوئی

چھوڑ گیا ردی کے داموں بکنے کو

چاٹ گیا مجھ کو اکشر اکشر کوئی

باہر ڈھونڈ رہے ہو تم کس دشمن کو

چھپا ہوا ہے اپنے ہی اندر کوئی

کوئی بھول چکا ہوگا شاید ہم کو

یاد نہیں آتا ہے اب اکثر کوئی

بلا رہا ہے جنگل جنگل سناٹا

بھٹک رہا ہے تنہا نگر نگر کوئی

کان لگائے آنکھ بچھائے بیٹھا ہوں

گیا ہے جب سے آنے کو کہہ کر کوئی