uske KHat mein jo likha ghair ka main nam ulTa

us ke ḳhat meñ jo likhā ġhair kā maiñ naam ulTā

laayā qāsid bhī mujhe vaañ se to paiġhām ulTā

ham musalmānoñ se yaañ tak to ye hindū bar-aks

ki kabhī ḳhat bhī jo karte haiñ to arqām ulTā

na vo saaqī na vo mai-nosh haiñ mai-ḳhāne meñ

ab to rahtā hai sar-e-ḳhum pe dharā jaam ulTā

ik to sī-pārā-e-dil tum ne kiyā hai barham

tis pe phir mujh ko hī tum dete ho ilzām ulTā

vāzhgūnī jo tabī.at meñ falak kī hai hanūz

nazar aatā hai zamāna sahar o shaam ulTā

shab-e-hijrāñ kī siyāhī na huī roz safed

ye varaq tū ne na ai gardish-e-ayyām ulTā

rasan-e-dām ko sayyād ne khīñchā to vahīñ

aan kar sar pe asīroñ ke girā daam ulTā

'mus.hafī' to abhī thā azm-e-safar par tayyār

ghar phirā jaa.e hai kyuuñ us kā sar-anjām ulTā

us ke KHat mein jo likha ghair ka main nam ulTa

laya qasid bhi mujhe wan se to paigham ulTa

hum musalmanon se yan tak to ye hindu bar-aks

ki kabhi KHat bhi jo karte hain to arqam ulTa

na wo saqi na wo mai-nosh hain mai-KHane mein

ab to rahta hai sar-e-KHum pe dhara jam ulTa

ek to si-para-e-dil tum ne kiya hai barham

tis pe phir mujh ko hi tum dete ho ilzam ulTa

wazhguni jo tabiat mein falak ki hai hanuz

nazar aata hai zamana sahar o sham ulTa

shab-e-hijran ki siyahi na hui roz safed

ye waraq tu ne na ai gardish-e-ayyam ulTa

rasan-e-dam ko sayyaad ne khincha to wahin

aan kar sar pe asiron ke gira dam ulTa

'mushafi' to abhi tha azm-e-safar par tayyar

ghar phira jae hai kyun us ka sar-anjam ulTa