اس کے کوچے میں دل کو کھو بیٹھے

اس کے کوچے میں دل کو کھو بیٹھے

زیست سے ناامید ہو بیٹھے

تیرے در پر فقیر ہو بیٹھے

دین و دنیا سے ہاتھ دھو بیٹھے

ابھی اٹھو نہ درد دل میرا

کوئی دم اور بھی سنو بیٹھے

مجھ کو سمجھاؤ مت عزیزو اک آن

پاس میرے اسے کہو بیٹھے

اٹھ گئی دل سے آرزوئے بہشت

اس کے کوچے میں جا کے جو بیٹھے

دل کو سمجھاؤں سو طرح مجھ پاس

ایک دم بھی جو آ کے وہ بیٹھے

جوں لگا کہنے درد دل بولا

بیٹھنا ہے تو چپ رہو بیٹھے

جب سے عاشق ہوا تو اے افسوسؔ

تب سے ہم تو تجھی کو رو بیٹھے