uske kuche se to main be-sar-o-saman nikla

us ke kūche se to maiñ be-sar-o-sāmāñ niklā

hashr kar dūñgā agar qabr se uryāñ niklā

muntazim ġhair hue laash tire dar se uThī

haif ghar se na magar tū pa.e-sāmāñ niklā

aa ke aġhyār ne kī dafn-o-kafan kī tadbīr

dār-e-duniyā se ye maiñ be-sar-o-sāmāñ niklā

mah-e-nau dekhte hī haath baḌhā.e sab ne

shukr hai ye tire vahshī kā garebāñ niklā

merī āñkhoñ ke talātum ne Duboyā mujh ko

josh-e-girya hī mirā bā.is-e-tūfāñ niklā

jān-o-dil ko bhī samajhtā huuñ ki hai maal us kā

mujh sā duniyā meñ kahāñ be-sar-o-sāmāñ niklā

ātish-e-ishq se ab kaun bachā.e mujh ko

dil bhī niklā to charāġh-e-tah-e-dāmāñ niklā

lāsheñ parvānoñ kī phikvā.īñ mirī laash ke saath

sub.h ko sohbat-e-jānāñ se ye sāmāñ niklā

jazb-e-dil dekh to āshiq kā zarā o zālim

TukḌe ho ho ke tire tiir kā paikāñ niklā

ishq-e-gesū meñ ajab raat kaTī hai merī

naala dil se koī niklā to pareshāñ niklā

vasl kā zikr nahīñ qissa-e-ġham se hāsil

kyoñ suneñ ham ki kisī aur kā armāñ niklā

mere ahbāb ye kahte haiñ ki shā.ir hai 'shafīq'

hai to jāhil ye magar ḳhuub ġhazal-ḳhvāñ niklā

us ke kuche se to main be-sar-o-saman nikla

hashr kar dunga agar qabr se uryan nikla

muntazim ghair hue lash tere dar se uThi

haif ghar se na magar tu pae-saman nikla

aa ke aghyar ne ki dafn-o-kafan ki tadbir

dar-e-duniya se ye main be-sar-o-saman nikla

mah-e-nau dekhte hi hath baDhae sab ne

shukr hai ye tere wahshi ka gareban nikla

meri aankhon ke talatum ne Duboya mujh ko

josh-e-girya hi mera bais-e-tufan nikla

jaan-o-dil ko bhi samajhta hun ki hai mal us ka

mujh sa duniya mein kahan be-sar-o-saman nikla

aatish-e-ishq se ab kaun bachae mujh ko

dil bhi nikla to charagh-e-tah-e-daman nikla

lashen parwanon ki phikwain meri lash ke sath

subh ko sohbat-e-jaanan se ye saman nikla

jazb-e-dil dekh to aashiq ka zara o zalim

TukDe ho ho ke tere tir ka paikan nikla

ishq-e-gesu mein ajab raat kaTi hai meri

nala dil se koi nikla to pareshan nikla

wasl ka zikr nahin qissa-e-gham se hasil

kyon sunen hum ki kisi aur ka arman nikla

mere ahbab ye kahte hain ki shair hai 'shafiq'

hai to jahil ye magar KHub ghazal-KHwan nikla