uske pahlu se lag ke chalte hain

us ke pahlū se lag ke chalte haiñ

ham kahīñ Tālne se Talte haiñ

band hai mai-kadoñ ke darvāze

ham to bas yūñhī chal nikalte haiñ

maiñ usī tarah to bahaltā huuñ

aur sab jis tarah bahalte haiñ

vo hai jaan ab har ek mahfil kī

ham bhī ab ghar se kam nikalte haiñ

kyā takalluf kareñ ye kahne meñ

jo bhī ḳhush hai ham us se jalte haiñ

hai use duur kā safar dar-pesh

ham sambhāle nahīñ sambhalte haiñ

shaam furqat kī lahlahā uTThī

vo havā hai ki zaḳhm bharte haiñ

hai ajab faisle kā sahrā bhī

chal na paḌiye to paañv jalte haiñ

ho rahā huuñ maiñ kis tarah barbād

dekhne vaale haath malte haiñ

tum bano rang tum bano ḳhushbū

ham to apne suḳhan meñ Dhalte haiñ

us ke pahlu se lag ke chalte hain

hum kahin Talne se Talte hain

band hai mai-kadon ke darwaze

hum to bas yunhi chal nikalte hain

main usi tarah to bahalta hun

aur sab jis tarah bahalte hain

wo hai jaan ab har ek mahfil ki

hum bhi ab ghar se kam nikalte hain

kya takalluf karen ye kahne mein

jo bhi KHush hai hum us se jalte hain

hai use dur ka safar dar-pesh

hum sambhaale nahin sambhalte hain

sham furqat ki lahlaha uTThi

wo hawa hai ki zaKHm bharte hain

hai ajab faisle ka sahra bhi

chal na paDiye to panw jalte hain

ho raha hun main kis tarah barbaad

dekhne wale hath malte hain

tum bano rang tum bano KHushbu

hum to apne suKHan mein Dhalte hain