اس کے تیور جو نظر آئے بگڑنے والے

اس کے تیور جو نظر آئے بگڑنے والے

ہو گئے زیر زمانے کے اکڑنے والے

نہ تو گھر کا ہے پتہ کچھ نہ خبر اپنی ہے

ایسے ہوتے ہیں محبت میں اجڑنے والے

تو بھی اڑ جائے گا سوکھے ہوئے پتے کی طرح

تتلیاں بھاگ کے ہاتھوں میں پکڑنے والے

کس طرح ایک ہی جھونکے سے بجھا گھر کا چراغ

تم تو ٹھہرے تھے ہواؤں سے بھی لڑنے والے

کب مرے پاؤں میں زنجیر وفا ڈالے گا

میرے شانوں کو محبت سے جکڑنے والے

ڈھونڈھتا ہوں میں تجھے آج ہر اک میلے میں

مجھ سے کل بھیڑ میں اے دوست بچھڑنے والے

آشیانے کی اجازت تو بجا ہے لیکن

پیڑ ناصرؔ مجھے لگتے ہیں اکھڑنے والے