اس کی آمد مجھے خوشیوں کا پتہ دیتی ہے

اس کی آمد مجھے خوشیوں کا پتہ دیتی ہے

اک نظر اس کی مرا رنج بھلا دیتی ہے

زندگی روز عطا کرتی ہے اک زخم نیا

سانس لینے کی مجھے خوب سزا دیتی ہے

بے بسی میری اڑاتی ہے مرا خوب مذاق

بھوک کم ظرف کے آگے بھی جھکا دیتی ہے

لوٹ جاتی ہوں میں پھر اندھی ڈگر کی جانب

یاد تیری مجھے خاموش صدا دیتی ہے

جینے دیتی ہی نہیں تلخ حقیقت مجھ کو

میرے خوابوں کی یہ زنجیر ہلا دیتی ہے

کار دنیا سے نہیں ہوتا ہے احساس تھکن

بے رخی اپنوں کی انساں کو تھکا دیتی ہے

ڈوبتی کشتی کو ملتا ہے کنارہ پھر سے

کوئی امید نیا مژدہ سنا دیتی ہے

راہ میں لاکھ بچھائے کوئی کانٹے اس کے

دل سے دشمن کو بھی فرزانہؔ دعا دیتی ہے