اس کی ایک اک بات کا ہم نے کیسا کیسا پاس کیا

اس کی ایک اک بات کا ہم نے کیسا کیسا پاس کیا

جسم کو اس نے لباس کہا تو ہم نے ترک لباس کیا

اس کو دیکھ کے میں چپ چپ تھا اس نے سمجھا سکتہ ہے

آئینے پر آنسو چھڑکے جانے کیا احساس کیا

جو پتھر بھی میرے سر پہ لگا وہ آخر موم ہوا

جس پر اس کا دل آیا اس پتھر کو الماس کیا

منصف ایک قطار میں شرمندہ شرمندہ بیٹھے تھے

سناٹا تھا جب سرمد نے عدالت میں اجلاس کیا

نکہت گل میں اس کے بدن کی خوشبو باد صبا لائی

اس کی یاد نے دل کو مسوسا جی کو بہت ہی اداس کیا

لال ہوئی انساں کے لہو سے ایودھیا کی ساری دھرتی

رام کو چودہ سال نہیں جیون بھر کو بنباس کیا

ہم کو دیکھ کے اس کے ہونٹوں پر آئی تھی اک مسکان

ہم کو گمان ہوئے ہیں کیا کیا کیا کیا ہم نے قیاس کیا

ایک حسیں کو کہتے سنا وہ کتنا خود سر شاعر تھا

ہم نے کمالؔ کو سدھ کیا ہے ہم نے کمالؔ کو داس کیا