اس کی غم خواری کرو اور اس کی دل داری کرو

اس کی غم خواری کرو اور اس کی دل داری کرو

مصلحت کہتی ہے تم دشمن سے بھی یاری کرو

کم سے کم انصاف کا دامن نہ چھوڑو ہاتھ سے

میں کہاں کہتا ہوں تم میری طرف داری کرو

عمر بھر سہتے رہو بخشی ہوئی سانسوں کا جبر

عمر بھر دنیا میں جینے کی اداکاری کرو

گر گئی دیوار زنداں کٹ گئیں سب بیڑیاں

اب تو اے اہل جنوں اعلان بیداری کرو

منصفو ہم نے اندھیرے کو اندھیرا کہہ دیا

اب ہمارے قتل کے احکام بھی جاری کرو

ترک مے خانہ ہے شاعرؔ وضع داری کے خلاف

جام خالی ہے تو پینے کی اداکاری کرو