uski gham-KHwari karo aur uski dildari karo

us kī ġham-ḳhvārī karo aur us kī dildārī karo

maslahat kahtī hai tum dushman se bhī yaarī karo

kam se kam insāf kā dāman na chhoḌo haath se

maiñ kahāñ kahtā huuñ tum merī taraf-dārī karo

umr bhar sahte raho baḳhshī huī sāñsoñ kā jabr

umr bhar duniyā meñ jiine kī adākārī karo

gir ga.ī dīvār-e-zindāñ kaT ga.iiñ sab beḌiyāñ

ab to ai ahl-e-junūñ elān-e-bedārī karo

munsifo ham ne añdhere ko añdherā kah diyā

ab hamāre qatl ke ahkām bhī jaarī karo

tark-e-mai-ḳhāna hai 'shā.ir' vaz.a-dārī ke ḳhilāf

jaam ḳhālī hai to piine kī adākārī karo

us ki gham-KHwari karo aur us ki dildari karo

maslahat kahti hai tum dushman se bhi yari karo

kam se kam insaf ka daman na chhoDo hath se

main kahan kahta hun tum meri taraf-dari karo

umr bhar sahte raho baKHshi hui sanson ka jabr

umr bhar duniya mein jine ki adakari karo

gir gai diwar-e-zindan kaT gain sab beDiyan

ab to ai ahl-e-junun elan-e-bedari karo

munsifo hum ne andhere ko andhera kah diya

ab hamare qatl ke ahkaam bhi jari karo

tark-e-mai-KHana hai 'shair' waza-dari ke KHilaf

jam KHali hai to pine ki adakari karo