اس کی جاں نذر ہوئی رات لہو کو میرے

اس کی جاں نذر ہوئی رات لہو کو میرے

جس نے سمجھا شرر ایجادیٔ خو کو میرے

باغ میں گل کا ٹھہرنا بڑا دشوار ہوا

اس نے جب دیکھ لیا آئنہ رو کو میرے

اک شناسا ہی مرا دہر خرافات میں ہے

جو الگ وضع سے بھرتا ہے سبو کو میرے

منحصر آپ کی ہی طبع رواں پر ہے حضور

خوف شمشیر نہیں خشک گلو کو میرے

سربسر تو ہے مرا واقف احوال و جنوں

نقش پا تک نہیں ملتے ہیں کسو کو میرے

سطوت شان مری آب کہاں دیکھتی ہے

رنگ ہی رنگ ہیں درکار وضو کو میرے