uski nahin KHudai ki us ka KHuda nahin

us kī nahīñ ḳhudā.ī ki us kā ḳhudā nahīñ

tum jis ko mil ga.e use phir kyā milā nahīñ

sajde se sar uThāne ko jī chāhtā nahīñ

ab yā to ham nahīñ dar-e-dildār yā nahīñ

ik paikar-e-ḳhayāl kī allāh re mahviyat

maiñ ḳhud bhī ab nigāh meñ apnī rahā nahīñ

mahshar nisār us nigah-e-sharmsār par

kahnā paḌā ḳhudā se ye qātil mirā nahīñ

vo tinke jab uThā.e jalā Daale barq ne

gulshan meñ āshiyāñ kabhī apnā banā nahīñ

hadd-e-nigāh kab tirī rif.at ko pā sake

jalva tirā muqayyad-e-arz-o-samā nahīñ

darkār hai nigāh-e-karam varna ai karīm

mere liye ḳhazāna-e-qudrat meñ kyā nahīñ

nazreñ judā judā haiñ ḳhayālāt muḳhtalif

merī nazar se koī nahīñ dekhtā nahīñ

ik vaqfa-e-hayāt hai duniyā hai jis kā naam

itnī sī kā.enāt ko maiñ chāhtā nahīñ

is e'tinā kī daad bhī ai be-niyāz-e-ḳhalq

merā sar-e-niyāz kahīñ par jhukā nahīñ

andāza-e-jamāl ba-qadr-e-nigāh hai

chashm-e-kalīm jalva-tarāz-e-adā nahīñ

tū hī batā ki jaa.e kahāñ tujh ko chhoḌ kar

'afqar' tirā gadā hai kisī kā gadā nahīñ

us ki nahin KHudai ki us ka KHuda nahin

tum jis ko mil gae use phir kya mila nahin

sajde se sar uThane ko ji chahta nahin

ab ya to hum nahin dar-e-dildar ya nahin

ek paikar-e-KHayal ki allah re mahwiyat

main KHud bhi ab nigah mein apni raha nahin

mahshar nisar us nigah-e-sharmsar par

kahna paDa KHuda se ye qatil mera nahin

wo tinke jab uThae jala Dale barq ne

gulshan mein aashiyan kabhi apna bana nahin

hadd-e-nigah kab teri rifat ko pa sake

jalwa tera muqayyad-e-arz-o-sama nahin

darkar hai nigah-e-karam warna ai karim

mere liye KHazana-e-qudrat mein kya nahin

nazren juda juda hain KHayalat muKHtalif

meri nazar se koi nahin dekhta nahin

ek waqfa-e-hayat hai duniya hai jis ka nam

itni si kaenat ko main chahta nahin

is e'tina ki dad bhi ai be-niyaz-e-KHalq

mera sar-e-niyaz kahin par jhuka nahin

andaza-e-jamal ba-qadr-e-nigah hai

chashm-e-kalim jalwa-taraaz-e-ada nahin

tu hi bata ki jae kahan tujh ko chhoD kar

'afqar' tera gada hai kisi ka gada nahin