uski nazar mein pinhan mohabbat pe rae do

us kī nazar meñ pinhāñ mohabbat pe raa.e do

phir shahar-e-kam-nigah kī basārat pe raa.e do

maiñ ne kahā ki aap ke charche haiñ chār-sū

us ne kahā nahīñ mirī shohrat pe raa.e do

jis ko tumhārī yaad ne patthar banā diyā

palkeñ uThāo us kī shabāhat pe raa.e do

apne vazīfe yaad hī hoñge tumheñ magar

merī vafā kī pahlī tilāvat pe raa.e do

jis ne taḌaptī lāDlī būḌhe ko bech dī

tum us ġharīb-e-shahr kī hājat pe raa.e do

ik bojh kokh meñ liye andhī faqīrnī

kahne lagī mujhe mirī hurmat pe raa.e do

maiñ chāhtī huuñ sach inhī hoñToñ se ho bayāñ

dekho mirī taraf mirī hālat pe raa.e do

phir yuuñ huā vo der talak chīḳhtī rahī

maiñ ne faqat kahā thā mohabbat pe raa.e do

us ki nazar mein pinhan mohabbat pe rae do

phir shahar-e-kam-nigah ki basarat pe rae do

main ne kaha ki aap ke charche hain chaar-su

us ne kaha nahin meri shohrat pe rae do

jis ko tumhaari yaad ne patthar bana diya

palken uThao us ki shabahat pe rae do

apne wazife yaad hi honge tumhein magar

meri wafa ki pahli tilawat pe rae do

jis ne taDapti laDli buDhe ko bech di

tum us gharib-e-shahr ki hajat pe rae do

ek bojh kokh mein liye andhi faqirni

kahne lagi mujhe meri hurmat pe rae do

main chahti hun sach inhi honTon se ho bayan

dekho meri taraf meri haalat pe rae do

phir yun hua wo der talak chiKHti rahi

main ne faqat kaha tha mohabbat pe rae do