usko dekha tha faqat do-chaar lamhon ke liye

us ko dekhā thā faqat do-chār lamhoñ ke liye

ho ga.e tanhā jahāñ meñ kitnī sadiyoñ ke liye

raat kā pichhlā pahar mujh ko bashārat de gayā

aa rahī hai raushnī tārīk galiyoñ ke liye

koī sī rut ho sadā paayā hai un ko sogvār

mausamoñ kā qahr hai ma.asūm pattoñ ke liye

ab koī chehra koī manzar hameñ rokegā kyā

uTh chuke apne qadam pur-pech rastoñ ke liye

ek gul hai tujh ko pyārā ek gul mujh ko aziiz

kitne pāgal ho ga.e ham log rañgoñ ke liye

jin kā saaya maaoñ kī āġhosh se kuchh kam na thā

qatl ke ahkām haiñ ab un daraḳhtoñ ke liye

ab na.e pahlū se dekhā chāhiye bāhar kā rañg

muntaḳhab kiije na.ī jag.heñ darīchoñ ke liye

zaat ke tārīk ġhāroñ meñ darīche kholiye

rāsta koī to ho sūraj kī kirnoñ ke liye

kījiye 'betāb' raushan apnī palkoñ par diye

raushnī darkār hai be-nūr kamroñ ke liye

us ko dekha tha faqat do-chaar lamhon ke liye

ho gae tanha jahan mein kitni sadiyon ke liye

raat ka pichhla pahar mujh ko bashaarat de gaya

aa rahi hai raushni tarik galiyon ke liye

koi si rut ho sada paya hai un ko sogwar

mausamon ka qahr hai masum patton ke liye

ab koi chehra koi manzar hamein rokega kya

uTh chuke apne qadam pur-pech raston ke liye

ek gul hai tujh ko pyara ek gul mujh ko aziz

kitne pagal ho gae hum log rangon ke liye

jin ka saya maon ki aaghosh se kuchh kam na tha

qatl ke ahkaam hain ab un daraKHton ke liye

ab nae pahlu se dekha chahiye bahar ka rang

muntaKHab kije nai jaghen darichon ke liye

zat ke tarik ghaaron mein dariche kholiye

rasta koi to ho suraj ki kirnon ke liye

kijiye 'betab' raushan apni palkon par diye

raushni darkar hai be-nur kamron ke liye