اس کو ہوا ہے پیار کا آزار کس طرح

اس کو ہوا ہے پیار کا آزار کس طرح

نرگس چمن میں ہو گئی بیمار کس طرح

دل پر کرم کرے نگہ یار کس طرح

بیمار سے ہو پرسش بیمار کس طرح

آنکھیں ہیں کور جلوۂ جاناں نظارہ سوز

نکلے گی دل سے حسرت دیدار کس طرح

مرنا تھا سہل پاس وفا سے نہ مر سکا

اتنی سی بات ہو گئی دشوار کس طرح

دل میں بندھا تصور زلف دراز یار

زنجیر ہو گئی ہے گرفتار کس طرح

اے آہ گرم تیری تو شوخی نہیں ہے یہ

کمھلا گئے ہیں پھول سے رخسار کس طرح

اتنا کوئی خدا کے لئے آ کے دیکھ لے

دم توڑتا ہے مضطرؔ بیمار کس طرح