اس کو جب دیکھ لوں قرار آئے

اس کو جب دیکھ لوں قرار آئے

دل کے صحرا میں بھی بہار آئے

ان کی قربت میں گزرا ہر لمحہ

زیست میں میری بار بار آئے

پیاری صورت جو دیکھ لے تیری

کیسے تجھ پر نہ اس کو پیار آئے

وہ ہمیں مڑ کے دیکھتا بھی نہیں

ہم دل و جان جس پہ وار آئے

میں نے تو گل کی آبیاری کی

میرے حصے میں صرف خار آئے

وعدہ کرتے ہو بھول جاتے ہو

کیسے پھر تم پہ اعتبار آئے

دھوپ ہے اور سفر ہے صحرا کا

اک شجر کوئی سایہ دار آئے

میں پکاروں جب اس کو اے ازکیٰؔ

سر کے بل چل کے میرا یار آئے