usko jab dekh lun qarar aae

us ko jab dekh luuñ qarār aa.e

dil ke sahrā meñ bhī bahār aa.e

un kī qurbat meñ guzrā har lamha

ziist meñ merī baar baar aa.e

pyārī sūrat jo dekh le terī

kaise tujh par na us ko pyaar aa.e

vo hameñ muḌ ke dekhtā bhī nahīñ

ham dil-o-jān jis pe vaar aa.e

maiñ ne to gul kī ābyārī kī

mere hisse meñ sirf ḳhaar aa.e

va.ada karte ho bhuul jaate ho

kaise phir tum pe e.atibār aa.e

dhuup hai aur safar hai sahrā kā

ik shajar koī sāya-dār aa.e

maiñ pukārūñ jab us ko ai 'azkā'

sar ke bal chal ke merā yaar aa.e

us ko jab dekh lun qarar aae

dil ke sahra mein bhi bahaar aae

un ki qurbat mein guzra har lamha

zist mein meri bar bar aae

pyari surat jo dekh le teri

kaise tujh par na us ko pyar aae

wo hamein muD ke dekhta bhi nahin

hum dil-o-jaan jis pe war aae

main ne to gul ki aabyari ki

mere hisse mein sirf KHar aae

wada karte ho bhul jate ho

kaise phir tum pe eatibar aae

dhup hai aur safar hai sahra ka

ek shajar koi saya-dar aae

main pukarun jab us ko ai 'azka'

sar ke bal chal ke mera yar aae