اس کو جینے کا ہنر آتا نہیں

اس کو جینے کا ہنر آتا نہیں

جس کے چہرے پہ کوئی چہرہ نہیں

آدمی کیسا ہے وہ کیسے کہوں

جستجو کی آنکھ سے دیکھا نہیں

دور نو نے جیسے کانٹے بو دیے

پھول لہجہ اب کہیں ملتا نہیں

ہر نظارے میں چھپا بیٹھا ہے وہ

گر تجسس ہو تو پھر پردہ نہیں

چھین لی ہیں وقت نے یادیں سبھی

یاد اب کوئی مجھے آتا نہیں

اب کے موسم نے یہ دی کیسی سزا

پیڑ کوئی بھی ثمر والا نہیں

غم نہیں اس کے سوا راحتؔ کوئی

آج تک اس نے مجھے سمجھا نہیں